A rodaxe, da man de Ledesma Producións, comezou o pasado luns 7 de xullo no IGI, e durará tres semanas. Xa nos tarda ver o resultado... Polo de pronto, podemos seguir o proceso no seu blog.

chuzame

Estaleiro Editora presenta así o seu segundo volume (o primeiro fora o poemario Plan de fuga, de Alberto Lema), e inaugura unha nova colección, coa que pretende explorar novas vías de difusión para o noso teatro, xénero "habitualmente desatendido e minorizado no sistema editorial galego". Podemos obtelo xa a través do web da editora, por medio da descarga libre e gratuíta.

Este selo aposta pola edición independente, e quere, coa apertura desta nova liña de publicación, "afondar na súa configuración como alternativa ao circuíto oficial da literatura e do pensamento subsidiados, de que tanto vén dependendo o teatro galego e ten como obxectivo a creación dun espazo de liberdade para a dinamización cultural á marxe das institucións oficiais".

Actores e fundadores da compañía Teatro Cachuzo, os autores contan cunha ampla traxectoria no sistema teatral galego. Rubén Ruibal (Ribadeo 1970) foi gañador do premio Álvaro Cunqueiro 2006 con Limpeza de sangue (o sangue fai ruído), editado por Edicións Xerais de Galicia en 2007, e Premio Nacional de Literatura Dramática. Carlos Losada (Cambados 1966) foi gañador do premio Manuel María de literatura dramática infantil (concedido polo IGAEM) pola súa obra Game Over (Xerais 2007). Parabéns aos autores e á editorial por difundiren o teatro dende a cultura libre!

chuzame

Hola .
Son un veciño de San pedro de 22 anos e estaba navegando pola rede en busca dalgunha oferta teatral ou dalgun tipo de actividade relacionada no Barrio de San pedro. A miña gran sorpresa foi que era inexistente, e sen embargo sí existía de outras materias ó longo do ano. Eu creo que sería bo para o barrio e mesmo para os veciños o dispoñer de algunha oferta cultural de teatro , aínda que son consciente das posibles dificultades. E mesmo lendo na rede, encontreivos como una plataforma nacida no Barrio, polo que me pareceu moi axeitado dirixirme para dar a miña humilde opinión ou proposta a vós, como coñecedores de San Pedro e porque tedes relacion cos veciños.Sen máis que dicir espero a vosa resposta e mando unha aperta a todos os compoñentes.        Saudos

En efecto, a nosa idea orixinal era crear un auténtico grupo aberto á participación de todos e todas, co CSC da Trisca como núcleo principal, onde toda a xente compartise coñecementos e experiencias, se puidesen organizar talleres... A falta de tempo e de dispoñibilidade reduciu as posibilidades ao que estamos a facer agora (ensaiar como, cando e onde podemos, a partir das oito e en bares onde non poñan a Eurocopa), pero se cadra era interesante pensar en relanzar a idea e que houbese unha plataforma de verdade para agrupar a actividade teatral do barrio (que é moita), e chegar a pensar en actividades regulares.

Sobre O porqué do por que... Iso, levamos oito días de italianas no Rei (en Concheiros) e en canto teñamos o texto como é debido ensaiaremos de vez. A ver se para setembro ou así empezamos a movela...

chuzame

Pero tamén podemos acceder a obras de literatura universal traducidas ao galego na Biblioteca Virtual da Asociación de Tradutores Galegos BIVIR, como clásicos de Molière (Don Xoán ou o festín de pedra, traducido por Eva Méndez Fernández).

A mellor noticia sobre teatro na rede témola na publicación, a través da plataforma A Regueifa, d'A triloxía das miniaturas, de J.J.G. Rodicio. Que un autor ou unha autora colgue da rede, baixo licenza Creative Commons, a súa creación, libre e de balde, e que a presente como unha "proposta para compañías pequenas, medianas ou afeccionadas. Que son moitas" é un moi bo sinal. Amais, a obra conta cun blog de referencia, para que cadaquén poida facer as súas achegas, polo cal o proceso de creación non está pechado nin é restrinxido, senón aberto e colectivo. Unha iniciativa moi moi sa, que pode sernos de moita utilidade ás compañías pequechas ou afeccionadas que non temos un can para pagarlle á SGAE (ou non queremos, que pasa?).

chuzame

"Existen numerosas hipóteses sobre as orixes do teatro, pero a que máis me chama ten forma de fábula: Unha noite, en tempos inmemoriais, un grupo de homes reuniuse nunha canteira para se quentar arredor do lume e contar historias. De súpeto, un deles tivo a idea de se erguer e utilizar a súa sombra para ilustrar o seu conto. Usando a luz das lapas fixo aparecer personaxes inmensos sobre os muros da canteira. Os outros, abraiados, recoñeceron un por un o forte e o débil, o opresor e o oprimido, o deus e o mortal.

Hoxe en día, a luz dos proxectores substituíu o lume orixinal, e a maquinaria escénica, os muros da canteira. E aínda que lles pese a algúns puristas, esta fábula lémbranos que a tecnoloxía está na mesma orixe do teatro e que non debera ser percibida como unha ameaza, senón como un elemento unificador.

A supervivencia da arte dramática depende da súa capacidade de se reinventar asumindo as novas ferramentas e as novas linguaxes. Se non, como podería o teatro seguir sendo testemuña dos grandes feitos da súa época e promover o entendemento entre os pobos, se el mesmo non dá probas de apertura? Como podería xactarse de ofrecer solucións aos problemas de intolerancia, de exclusión e de racismo se, na súa mesma práctica, se resiste a toda mestizaxe e integración?

Para representar o mundo en toda a súa complexidade, o artista debe propor formas e ideas novas e confiar na intelixencia do espectador, capaz de distinguir a silueta da humanidade neste xogo perpetuo de luces e sombras.

E é certo que de tanto xogar con lume, o ser humano corre o risco de se queimar, pero ten tamén a posibilidade de abraiar e iluminar".

chuzame

• Currículo de Histeria Teatro

chuzame